Umubaji utagira iranda, uwavuga ko atagira icyo ageraho ntiyaba yibeshye. Ibi si amakabyankuru, ahubwo ni ukuri kuzima. Impamvu nta yindi, umubaji wabigize umwuga akenera ko urubaho ruba rusoje neza, ruringaniye, rwogeje, rudafite amasubyo asumbana dore ko ibiti bigira amasubyo. Cg se imigongo ya hato na hato isumbana ku giti, urubaho n'impera zarwo.

Mu buryo burambuye IRANDA ikora ite imaze iki?

Iranda ni igikoresho abafundi bakoresha igihe barimo babaza imbaho, bagegena, baringaniza mbese bagenda bakuba urubaho kugirango rugire isura nziza bitewe n'icyo bashaka gukura muri urwo rubaho cg igiti.

Iranda ikura amashyundu n'imyanda ku giti: Iranda ikoranye ubuhanga butuma iyo uyisunitse, ibaza urubaho rukaringanira, cg rukavaho umwanda n'amasubyo asumbana, biryo umubaji akagera ku rugero rwiza yashakaga.

Kuringaniza imisozo n'inguni by'imbaho: Iranda ishobora gukoreshwa mu gihe basoza urubaho, ku mutwe no ku mpera zarwo. Ishobora kandi no gukoreshwa igihe bagegena inguni neza z'urubaho.

Gutanga ubwiza bw'urubaho: Iranda ikoreshwa nanone igihe baringaniza impera z'urubaho banoza cg bongeraho umugongo unyororotse cg wiburungushuye, mu gutanga ubwiza no kwirinda ko urubaho rwakeba urukozeho cg arwegamiye.

Gutegura uruteranyirizo rw'imbaho: mu gihe hari imbaho zikeneye guteranywa, ababaji bakoresha iranda mu koza uruteranyirizo rw'imbaho, bigatuma zifatana nta mwanya upfuye ubusa hagati.

Akazi kose kajyanye n'ububaji: kubera imiterere y'iki gikoresho, ababaji bakoresha iranda mu kazi kenshi cyane ko gutunganya imbaho zivanwamo ibikoresho byo mu nzu, mu biro n'ahandi. Bipfa gusa kuba bikomoka ku giti.

Urugi rwikuba: Iranda izwi cyane cyane kandi kuba ikoreshwa mu kongera guha ireme urugi cg idirishya, bikuba mu gihe cyo gufunga no gufungura. Urugero nk'urugi iyo rwanga gufunga neza cg gufunguka kubera kuba rwaragoramye, cg rwarabyimbye, hitabazwa iranda bigakemuka.

Umwanzuro:
Ni byinshi umuntu yavuga ku iranda n'ikoreshwa ryayo, Ababaji b'umwuga bo barabizi. Gusa n'ubwo iri mu bikoresho ngombwa mu bubaji, ariko hari ibindi bikoresho bikoreshwa nyuma yayo nk'imiseno itandukanye, tuzagarukaho mu nkuru zacu zizagenda ziza. Aha rero RIVER TRADING LTD yabonye ko ababaji bakenera ibikoresho bikomeye, biramba kandi byizewe, ihitamo cyane cyane iby'ibanze mu kazi kandi biri ku giciro buri wese yisangamo.
Umurimo unoze ni intego nziza ku munyamwuga, bikaba akarusho ukozwe hakiri kare.

Inkuru yateguwe na Clement Mukimbili
RIVER TRADING LTD